Pidato Adat Minang Sebelum Makan (Pitua Nasi)

Wednesday, December 9, 2015

PITUA NASI

Pangka 

adapun nan sapanjang baliau wakiekan kapado diri ambo nan ka ambo puhum pasambahan kapado datuak,alah iyo sabarih jamba nan talatak di hadapan sagalo datuak kito,jokok jaan nyo pikiran hati kami iolah gak angkuah bak cando cukuik di janang nan manantiang nan baa disinan kan iyo juo nan bak pitua komah datuak:

Mingkudu alah sudah kami kalo
Ditutuah mangkok di jalin
Di karek batang sikamumu
Di ateh parik urang tunggakan
Pari aie bapaga pandan
Singgalang koto badampiang
Kain gaba saeto juo
Baju biludu nak urang taluak
Ambiak saeto ka pambilai
Tak sagan kami mamiliah

Datuak sagalo panghulu lah baselo

Tuan sagalo alim lah basimpuah

Lah sadio sagalo isi jamu

Lah balirik cawan jo pinggan

Lah balatakkan nasi jo gulai

Lah langkok kopi jo aie

Mundan ka aie basuah lah bagandeng

Gawek aie basuahlah tangan

Tariak jamba santoklah juo
Nak tantu kurang kaditukuak

Karano janang lai tatagak-tagak juo baru komah datuak

Sakian sambah titah lah bapuhum kapado dt dahulunyo dt

Ujuang : nan sapanjang pitua dt tadi iyolah ambo paiyokan kapado sagalo dt sarato sagalo guru nan pitua dari pado baliau:

                 Pariaman jalan kabaruah

                 Di tabang batang sikararok

                 Batang jarami mudo-mudo

                 Kain gaba batapi sanan

                 Tanun nan surah rang punyonyo

                 Tingkuluak di bao malam

                 Sakin di asah ka pamenan

Nan baa jikok tangan ka kami basuah

Jamba dt ka kami santek

Kami nan banyak ba nan mudo

Jokok gawa mato jo tangan

Bari maaf kami kasamonyo di dt sagalo sipangkalan

Sakian sambah nan kadibanakan hanyo dt......

Kunun baitu kato dt iyo pulo tumah dt

                 Baju biludu nak urang taratak

                 Kain suto baragi cita

                 Kain bulu suto barameh

                 Kabaju suto nak rang bayang

Tariak lah padi kadipatah

Putiah ruponyo pai lasuah

Sarigalo hulu pangkalan

Kalimpanang dalam biduak

                 Jokok itu nan dt mintak

                 Alah samo saba jo rila

                 Dulu suko jo maaf

                 Sajak rundiang ka di karang

                 Janiah lah muka bak ka di basuah

                 Putiahlah hati bak kadisasah

                 Di kami sagalo si pangkalan

                 Alah kasanang hati dt

Kunun baitu kato dt iyo pulo t mah dt

Nan baik bak raso katakana

Nan elok bak raso katuju

Nan sariak rundiangan santiang

Masak padi gondo pagan

            Lah dapek kato nan bana

            Lah buliah rundingan nan katuju

            Manggarik talunjuak jo kalengkeng

            Manampak nasi dalam pinggan

pangka: jokok nan sapanjang persembahan dt td kan nan io juo bak pitua hanyo dt

                 Pik parik tabang ka lereng

                 Disemba alang jo sikok

                 Birik-birik kanai gatah

                 Di tanan lasi di tapi aie

                 Salusin kapeh rang pangkeh

Jarami batang rigo-rigo

Gunjo nak urang si gulandak

Di rameh padi jo sukatan

Padi rang taluak tigo jongko

        Kok manggarik tunjuak jo kalengkeng

        Alamat jamba nak basantok

        Pihak jamba kami antah lambiak antahnyo matah

        Karano nasi batanak jo api bakinco jo aie

        Jokok basuo lambiak jo matah

        Antah masin antah padeh

        Antah taraso antah tidak

        Kami di dapau baduo batigo

        Sakian sambah nan ka dibanarkan

        Mintak batarimo suko juo hanyo datuak.....

ujuang: jokok baitu kato datuak iyo juo tu mah dt..

            Dari sintuak andak ka bantan

            Padi si arang ateh batu

            Tumbuah cangkiang si hulu angin

            Kusuik kulindam dalam banang

            Pananun suto dalam ijuak

Ringan-ringan dalam kasua

Kalimaie di ateh param

Gaba di ateh tingkok pulo

Si gulandak batang jarami

            Manolah dt main patan

            Jaan di sabuik iko jo itu

            Mukasuik makan nak nyo kanyang

            Nieknyo minum nak nyo sajuak

Kok tanngan alah kami basuah

Jamba datuak ka kami santok

Akan tatapi basamo-samo kito makan

Baitu nan kandak hati kami

Pangka: kunun baitu kato dt io pulo tumah dt

                        Pariaman jalan ka baruah

                        Kaloyang sumua rang kasolok

                        Simabua kotonyo rato

                        Kain pundak panjang sambilan

Nan baa jokok tangan ka dt basuah

Jamba kami kadisantok

Bari baulu bamuaro

Baitu nan kandak si pangkalan

Ujuang: kunun baitu iyo pulo tumah dt

                        Kain sirah batapi sanan

                        Tasangkuik di kayu sakah

                        Dahan disitu ka rang jahik

                        Panjalo udang dalam lubuak

Bismilah sajak ka makan

Alhamdullilah akhirnyo sudah

Itu nan hulu muaronyo

Alah kasanang hati dt

Pangka:          ka pangka tanamlah siriah

                        Ka rimbo rambahlah paku

                        Kalimpanang dikida jalan

Dang kato kandak alah buliah

Pinto alah balaku

Lah sanang hati si pangkalan nyo lai dt.....

Baatohnyo basuah lah tangan nyo lai dt.......

Ujuang: balau datuak

            Nan kadipulangkan kapado datuak nan pitua di sagalo dt kito saraato sagalo guru kito,alah iyo di ateh pambarian dt tdi,di sanankan iyo juo bak pitua ko mah

Pitua baranti makan

Ujuang:           Kilek bakilek cincin deta

                        Di bao sutan malakewi

                        Golek lah tibo di nan data

                        Tak nyo namuah bajalan

                        Sungguah pun baitu babari pitua hanyo dt

Pangka:          dari darek ka tanah data

                        Basimpang jalan katalawi

                        Sulik aie parang jo ripan

Baa dan kato golek lah tibo di data

Kok tak namuah bajalan lai

Iyo lah patuik kito parantikan komah dt

Tariaklah diri basuahlah tangan hanyolai dt........