Pidato Adat Mamulangkan Naksu

Thursday, November 17, 2016

Pangka

Nan kadipulangkan kapado datuak, iyolah sadio pulo naksu kami nan tanamo silang nan bapangka, nan kadihadirkan ka hadapan datuak kito, baik kahariabaan sagalo guru, sungguah pun baitu babari kami pitua dari pado datuak, nan sapatah nan tun hanyo datuak.

Ujuang

Lah sampai datuak

Pangka 

Bilang singgo itu dahulu datuak

Ujuang

Baliau datuak, datuak............Nan kadipulangkan kapado datuak, apolah nan pitua datuak tadi, kan iyolah sadio pulo naksu datuak kito nan tanamo silang bapangka, nan kadihadirkan kapado sagalo datuak kito, baik dituan sagalo guru kan baitu kato datuak tadi, nan pitua di sagalo datuak kito, dang kato lah sadio naksu datuak nan tanamo silang bapangka, bakatangahkan sajo hanyo datuak, nak elok rupo dipandang nak baiek buni di danga hanyo datuak.

Pangka

Lah sampai datuak

Ujuang

Bilang singgo itu dahulu datuak

Pangka

Dang kato lah babari kami pitua daripado datuak nan sapatah nan tun, lah bakuasokan sajo ka janang nyolai datuak.

(Minta Isin)

Baliau datuak, datuak...........baisinkan ambo datuak, baliau datuak, datuak/............pun sadimikian pulo hanyo datuak, sungguah pun datuak dang kato lah rapek sagalo datuak, baik jo tuan sagalo guru, nan baa di ambo kan tidak toh katatiok bak bilang, kan taratok bak ibarek rang becatue, malainkan sambah datalah parsambahan ambo, ka saisi rumah nangkolah tampek ambo mamulangkan pasambahan, nan baa kapado datuak juolah pulangnyo parsambahan ambo datuak.

Ujuang

Kapado kito basamo kambali hanyotuak

Pangka

Adapun nan ka ambo puhunkan pasambahan kapado datuak, iyo pulolah ba wakie sagalo datuak kito nan tanamo silang ba pangka, kapado diri ambo, isin nan dari datuak, datuak........sarato diri datuak, datuak.......pun dihadapan pulo datuak, datuak...... di ateh malelokan nan sapanjang adat sagalo datuak kito, sarato di ateh pulang mamulangkan pasambahan kapado datuak, nan baa disinan lai kolah ka baisinkan ambo di sagalo datuak kito, baik di tuan sagalo guru kito, sungguahpun baitu babari pitua daripado datuak nan sapatah nantun hanyo datuak.

Ujuang

Lah sampai datuak

Pangka

Bilang singgo itu dahulu datuak

Ujuang

Saba molah datuak samintaro nak ambo paiyokan kapado sagalo datuak kito, baik di tuan sagalo guru kito dahulu hanyo datuak

Pangka

Saba molah datuak

Ujuang

Baliau datuak, datuak.....................Nan kadipulangkan kapado datuak, apolah nan pitua datuak tadi, kan iyolah datuak pulo yang manjadi wakie di sagalo datuak kito nan tanamo silang bapangka, isin nan dari datuak, datuak...........sarato di diri datuak............pun lah di hadapan datuak............diateh melelokan nan sapanjang adat sagalo datuak kito, sarato di ateh pulang mamulangkan parsambahan, lai kolah ka baisinkan di sagalo datuak kito, baik di tuan sagalo guru, kan baitu nan kato datuak tadi.

Pangka

Bana tumah datuak

Ujuang

Nan pitua di sagalo datuak kito baik di tuan sagalo guru, lah dalam nan biaso tumah tuak, hinggo ruyuang titisan aie, lidah titisan muluik, iduik biaso basiwakie, mati biaso basiwarih, nan baa dang kato datuaklah manjadi wakie di sagalo datuak kito nan tanamo silang bapangka, balakukan sajo di datuak nan sapanjang baliau wakiekan nantun hanyo datuak.

Pangka

Lah sampai datuak

Ujuang

Bilang singgo itu dahulu datuak

Pangka

Dang kato lah babari ambo pitua dari datuak nan sapatah nantun lah sanang paratian kami hanyolai datuak. Adapun nan sapanjang baliau wakiekan kapado diri ambo, nan ka ambo puhunkan parsambahan kapado datuak kito, baik kaharibaan sagalo guru kito, iyolah mangabakan ateh sampainyo, nan baa kini kan iyo minta ditarimo di sagalo datuak kito, baik di sagalo guru kito, nak tantu kurang ka di tukuak, nak peto senteng ka di bilai, sakian sambah titah lah bapuhun kapado datuak, datuak...........

Ujuang

Lah sampai datuak

Pangka

Bilang singgo itu dahulu datuak

Ujuang

Saba juo molah datuak samintaro nak ambo paiyokan kapado sagalo datuak kito, baik sagalo guru kito dahulu hanyo datuak.

Pangka

Saba molah datuak

Ujuang

Baliau datuak, datuak.............Nan pitua di sagalo datuak kito, baik dituan sagalo guru kito, apalah nan pitua datuak tadi, iyolah sabarih jamba nan talatak di hadapan sagalo datuak kito, baik di haribaan sagalo guru kito, kan iyolah mangabakan ateh sampainyo janang nan manatiang, nan baa kini, iyo minta batarimo di sagalo datuak kito, baik di tuan sagalo guru kito, nak tahu kurang ka ditukuak, nak peto senteng kadibilai, kan baitu kato datuak tadi.

Pangka

bana tumah datuak

Ujuang

Nan pitua di sagalo datuak kito, baik sagalo guru kito, kok titah bajunjuang, rasaki lah kasamo kito tarimo hanyolai datuak

Pangka

Lah sampai datuak

Ujuang

Bilang singgo itu dahulu datuak 

Pangka

Dang kato lah babari kami pitua nan sapatah nantun, kami nan tanamo silang bapangka lah ato pulo hanyolai datuak

Ujuang

Baliau datuak, datuak.......Nan kadipulangkan kapado datuak, alah iyo tantang pambarian datuak tadi komah datuak, nan pitua di sagalo datuak kito, baik di tuan sagalo guru kito, iyo pulo lah bak ibarek urang bajalan, lah sampai pulo kami di kayu nan rampak rimbun daun, sungguahpun baitu babari pitua daripado datuak nan sapatah nantun hanyo datuak

Pangka

Lah sampai datuak

Ujuang

Bilang singgo itu dahulu datuak

Pangka

Nan pitua disagalo datuak kito nan tanamo silang bapangka, nan baa dang kato lah tibo sagalo datuak kito di kayu nan rampak rimbun daun, balatakkan baban di sinan, baranti kito dahulu hanyo datuak.

Ujuang

Dang kato lah babari pitua daripado datuak nan sapatah nantun, lah bakuasokan sajo hanyo datuak.

Pangka

Baitu molah datuak, nan baa jikok nan balum ka bak mano kolah datuak.

Ujuang

Jikok balun, kan iyo bajalang juo hanyo datuak.

Pangka

Baliau datuak, datuak...........Nan kadipulangkan juo kapado datuak, alah iyo tantang nan tarupo di hadapan sagalo datuak kito, baik di tuan sagalo guru, alah jadi kolah ka kami ganjua suruik, sungguah pun baitu babari pitua daripado datuak nan sapatah nantun hanyo datuak.

Ujuang

Lah sampai datuak

Pangka

Bilang singgo itu dahulu datuak

Ujuang

Nan pitua di sagalo datuak kito, baiek di tuan sagalo guru kito, hinggo bajambo bak basiang, bagajuue suruik bak ibarek urang batanam hanyo datuak.

Pangka

Lah sampai datuak

Ujuang

Bilang singgo itu dahulu datuak

Pangka

Nan baa dang kato lah babari pitua daripado datuak nan sapatah nantun, lah bakuasokan sajo di janang hanyo datuak.

Ujuang

Baliau datuak, datuak.............Nan kadipulangkan kapado datuak, adokolah baban barek nan kadipikue, ringan ka di jinjieng di sagalo datuak kito nan tanamo silang bapangka karajo nan bajunjuang, sungguahpun baitu babari pitua daripado datuak nan sapatah nantun hanyo datuak.

Pangka

Lah sampai datuak

Ujuang

Bilang singgo itu dahulu datuak

Pangka

Saba molah datuak samintaro nak ambo pulangkan kapado sagalo datuak kito nan tanamo silang bapangka dahulu hanyo datuak.

Ujuang

Saba molah datuak

Pangka

Baliau datuak, datuak..........Nan kadipulangkan kapado datuak apo nan pitua datuak tadi, ado kolah baban barek nan kadipikue, ringan ka di jinjieng di sagalo datuak kito nan tanamo silang bapangka, kan baitu kato datuak tadi

Ujuang

Bana tumah Datuak

Pangka

Nan pitua di sagalo datuak kito, iyo ado barek kadipikue, ringan ka di jinjieng komah datuak, adapun niek di kami nan tanamo silang bapangka, iyo tantang anak kapanakan kami komah datuak

Ujuang

Bailau datuak, datuak.................Nan kadipulangkan kapado datuak, nan pitua disagalo datuak kito, baiek di tuan sagalo guru, sorang baranang minum aie sambie manyiruak galah lalu, lai kolah raso kamanjadi , sungguahpun baitu babari kami pitua daripado datuak nan sapatah nantun hanyo datuak.

Pangka

Lah sampai datuak

Ujuang

Bilang singgo itu dahulu datuak

Pangka

Nan pitua di sagalo datuak kito nan tanamo silang bapangka, elok kato dek baiyo, rancak rundieng dek mupakek, lah kamanjadi bana hanyolai datuak, balalukan sajo hanyo datuak.

Ujuang

Nan baa dang kato lah manjadi, ba pinyurueh molah datuak, suruah tariek parapian sarato kamayan hanyo datuak

Pangka

Baitu molah datuak, akan tetapi saba molah datuak samintaro kami manyadiokan dulu hanyo datuak.

Ujuang

Jokok ka saba, saba molah datuak, akan tetapi jan malah lambek di jalan hanyo datuak.

Pangka

Lah hampiang katibo hanyo datuak

Baliau datuak, datuak..............Nan kadipulangkan kapado datuak, alah iyo tantang di kandak datuak tadi komah datuak, iyolah sadio pulo parapian sarato kumayan, dihadapan kami nan tanamo silang nan bapangka, sungguhpun baitu babari pitua daripado datuak nan sapatah nantun hanyo datuak

Ujuang

Lah sampai datuak

Pangka

Bilang singgo itu dahulu datuak

Ujuang

Baliau datuak, datuak..........Nan baa dang katolah sadio parapian sarato kumayan dihadapan datuak nan tanamo silang bapangka, bapasang niek jo kaue, babaka kumayan hanyo datuak

Pangka

Lah sampai datuak

Ujuang

Bilang singgo itu dahulu datuak

Pangka

Baliau datuak, datuak............Nan baa dang kato kaue kadipasang, kumayan kadibaka, adapun nan niek di kami nan tanamo silang nan bapangka, karajo nan bajunjuang, iyolah sabarih wakyo nan kito paralekkan nangko komah datuak, nan baa jokok wak inyo nan kito paralekkan nangko, jokok nan dimukasuik kan alah sampai, nan di ama alah pacah, jikok dipandang lah elok rupo, di dangapun lah baiek buni, nan baa di sinan, kan iyo juo nan bak pitua datuak.

Kupiek mandi di hulu

Manjabo ikan di karang

Buniek maso dahulu

Sampainyo maso sekarang

Dibali kuyan putieh

Di buue di langan baju

Asok mambubuang sampai kabaliek

Jokok kandak alah lah bulieh

Pinto alah balaku

Lah sanang patian antaro timba jo baliek

Nan baa jikok di kami, nan tanamo niniek jo mamaknyo kan iyo bak pitua datuak 

Apo kaguno junjuang lado

Ka paapiek dindieng jo sasak

Apo ka guno rang sumando

Iyo ka ganti niniek jo mamak

Katampek kami baiyo - iyo, ka lawan barundieng - rundieng, ka tampek picayo hati, kabakeh tuluh pikiran, nan jikok tantang diri wak inyo kaduonyo nangko, bak pitua datuak juo

Basin-basin ditanjuang pati

Gunuang irok di panyakalan

Si ulah balaie ka pitalah

Sidiek nak urang bungo tanjuang

Kan iyo sadanciang bak basi

Sa ciok bak ayam

Jikok ka ilie satulak galah

Jikok ka mudiek sarangkueh dayuang

Sacinto samukasuik wak inyo kaduonyo nangko handaknyo datuak, jokok umuenyo di panjangkan Allah, rasakinyo dimurahkan Allah, apo-apo mukasuiknyo ka nan baik, lakeh disampaikan Allah handaknyo datuak, nan baa dang kato lah di partamukan Allah ta'ala dirinyo kaduonyo nangko kan iyo juo bak pitua datuak

Biduak sikoci nak rang malako

Ka ilie batulak galah

Sarek mamuek anak cino

Ka lasi darun mandarum

Di tapuang badai jo ribuik

Jokok tantang dirinyo kaduonyo nangko

Iyo banalah untuang baik pambarian Allah

Ibarek biduek jo pandayuang

Umpamo tapuang elo jo rabuik ibarek subang jo talingo

Lah wak inyo kaduonyo nangko handaknyo datuak

Salorong masuek ka nagari kito datuak, datuak sagalo panghulu sa andiko, tuan sagalo malin sa agamo, datuak sagalo manti satimbangan, hulubalang salangkah nan rapek sakato.

Aie tanang tampek mandi

Lah kambang bungo salibu

Bumi sanang padi manjadi

Taranak kambang baribu-ribu

Batu banyak jo muaro paneh

balaie kapa ka piaman

samo banyak hujan jo paneh

Naknyo manjadi tanam tanaman

Sakiro - kiro itu kauenyo hanyo datuak, jokok kurang batukuak, senteng babilai hanyo datuak

Ujuang

Lah sampai datuak

Pangka

Bilang hinggo itu dahulu datuak

Ujuang

Jokok sapanjang pakauran datuak tadi, tidak pulo toh ka ta ulang bak mambajak, ka tabaliek bak ibarek rang mamangkue jokok ka atehnyo lah ta tambun jantan, kabawahnyo takasiek bulan, jokok di umpamokan bak ibarek parmato, iyo banalah di kapuek-kapueknyo bana talataknyo lai datuak, nan baa jokok di sagalo datuak kito, baiek disagalo guru kito, lah baikuik kan sajo kapado nabi, lah basarukan kapado malaikat, lah bamintakkan do'a kapado Allah, kapado rasulullah di tuan sagalo guru hanyo lai datuak.

Pangka

Lah sampai datuak

ujuang

Bilang singgo itu dahulu datuak

Pangka

Baliau datuak, datuak.................baa dang kato lah baikuikkan kapado nabi, basarukan kapado malaikat, lah bamintakkan doa kapado Allah, kapado Rasullullah di tuan sagalo guru, nan baa jikok kumayan lah jatuah masuak api hanyo datuak.

Ujuang

Baliau angku lah mandoa hanyo datuak

Pangka

Baliau datuak, datuak.......pun sedemikian pulo datuak. Sungguahpun datuak ka sa isi rumah nagkolah tampek ambo mamulangkan pasambahan, nan baa kapado datuak lah pulangnyo pasambahan ambo datuak, nan dang kato pakarajaan lah salamaik, nan manarimo lah nimaik, pun lah dipati pulo dengan doa dang kato cok iko malamnyo hari, sagalo datuak kito, baik sagalo guru kito, lah nak barmuhun pulang hanyo lai datuak, sungguahpun baitu babari kami pitua dari pado datuak nan sapatah nantun hanyo datuak.

Ujuang

Lah sampai datuak

Pangka

Saba molah datuak samintaro nak ambo pulangkan kapado sagalo datuak kito nan tanamo silang bapangka dahulu datuak

Ujuang

Baliau datuak, datuak........Nan kadipulangkan kapado datuak, apolah nan pitua datuak tadi nan baa dang kato pakarajaan lah salamaik, nan manarimo lah nimaik, pun lah dipati pulo dengan doa, dang kato lah cok iko malamnyo hari sagalo datuak kito, baik sagalo guru kito, lah nak barmuhun pulang kan baitu kato datuak tadi.

Pangka

Bana tumah datuak

Ujuang

Nan pitua di sagalo datuak kito nan tanamo silang bapangka jokok pintu lah singkok, janjang lah takanak, baturuik sajo jalan ka hilaman hanyolai datuak, akan tetapi pihak kapado diri datuak, iyo tingga sabanta hanyo datuak

Pangka

Baitu malah datuak, nan baa jikok sagalo datuak kito, baik sagalo guru kito lah sorang tagak sajo maurak selo hanyo lai datuak