Maanta Marapulai
Ujung
Nan kadipulangkan kapado datuak, nan pitua di sagalo datuak kito baik di tuan sagalo guru kan iyo juo bak pitua komah datuak
Sibarumbun di koto tangah
Parik rabah jo daunnyo
Barimbun daun palabuikan tanah
Balabek buah bapayangan dahan
Salamo-lamo diraia, salibu juo aie nan tabao
Salamo – lamo duduek rundiengan juo nan kasuo
Sungguh baitu babari pitua hanyo datuak
Pangka
(sabakan lalu di panggil)
Nan kadipulangkan apolah nan pitua dari pado datuak tadi, Sibarumbun di koto tangah ,Parik rabah jo daunnyo, Barimbun daun palabuikan tanah, Balabek buah bapayangan dahan, Salamo-lamo diraia, salibu juo aie nan tabao, Salamo – lamo duduek rundiengan juo nan kasuo, Sungguh baitu babari pitua hanyo datuak. Nan pitua dari datuak nan tanamo silang nan bapangka karajo nan bajunjuang
Apobilo kaciek hutan dek angsuran
Lansainyo iyo di bayaran juo hanyo datuak
Ujung
Lah sampai datuak
Pangka
Bilang singgo itu dulu datuak
Ujung
Bamudiakkan janang hanyo datuak (siriehi orang pangka mulai dari penghulu dan seterusnya)
Pangka
Sarang baranang
Mamulangkan naksu
Makan
Baranti makan
Ujuang
Sarang baranang
Maanta tungkek
Bawakie
Adapun nan sapanjang baliau wakiekan kapado diri ambo, nan ka ambo puhum pasambahan kapado datuak nan pitua dek sagalo datuak kito baik di tuan sagalo guru , Tak kalo warih kadijawek, pusako kaditolong dari urang tuo-tuo kito, nan kito paturun panaiekan dari luak nan tigo ka lareh duo, ujuang luak kapalo rantau, masuak ka kubuang tigo baleh, kadalam nagari kito nangko. Kan iyolah buek kasan pangabek pusako kasan panunggu, jokok adek kanlah turun temurun, disako sunduak basunduak, nimbaa kato sako sunduak basunduak kan iyolah pulai bapangkek naiek pusako bapangkek turun, manolah pulai pangkek naiek, maninggakan rueh jo buku maninggakan rantieng jo sularo, manolah dikatokan pulai bapangkek turun maninggakan barih jo balabeh maninggakan adek jo pusako.
Manolah nan ka manjadi adek jo pusako disinan kan bak pitua datuak juo
Balai rang solok anam suku
Baukie basaluak di puncaknyo
Di singa paneh tangah hari
Jamua takaka tak balingkuk
Dari suku ka dalam suku
Dari korong ka dalam korong
Pun dari nagari ka nagari
Adek sumando manyumando
Adek puti duduak mananti
Adek rajo datang bajapuik
Manolah kami datang kamari nangko
Kan iyolah manjapuik rajo datuak nan kanamonyo
Nan baa jokok kami japuik nantun
Ka tabao samo jo kami hanyo datuak..............
Sakian sambah titah nan bapuhum kapado datuak
Pangka
Lah sampai datuak
Ujuang
Bilang singgo itu
Pangka
Sabalah molah datuak kami pulangkan kapado sagalo datuak kito dan banamo silang nan bapangka dahulu hanyo datuak............
Balai rang solok anam suku
Baukie basaluak di puncaknyo
Di singa paneh tangah hari
Jamua takaka tak balingkuk
Dari suku ka dalam suku
Dari korong ka dalam korong
Pun dari nagari ka nagari
Adek sumando manyumando
Adek puti duduak mananti
Adek rajo datang bajapuik
Manolah kami datang kamari nangko
Kan iyolah manjapuik rajo datuak nan kanamonyo
Nan baa jokok kami japuik nantun
Nan pitua di sagalo datuak kito nan banamo silang nan bapangka karajo nan bajunjuang kan iyo juo nan bak pitua datuak
Layang layang tabang malayang
Singgah manggantia bungo rotan
Turun puti jo dayang-dayang
Turun rajo jo panjaputan
Baa kini iyolah panjaputan tubana komah datuak
Ujuang
Jokok kandak lai kabulieh pinto lai kabalaku, nimba kini bamudiekkan janang hanyo datuak..........
Pangka
Baitu molah datuak..............
Ujuang
Kirimkan kepada
Mamak
Urang sumando
Urang maanta
Pangka
Jokok nan sapanjang pakiriman datuak tadi iyolah ambo paiyo patidokan kahadapan sagalo datuak kito nan pitua daripado baliau
Jokok putiah iyolah tacelak
Hitam lah tabirumbun hanyo datuak
Ujuang
Nan baa kato putieh lah tacelak, hitam lah tabirumbun, jokok batali kami nak tak mairik, batampuak kami nak tak manjinjiang hanyo datuak............
Pangka
Baitu molah datuak, akan tetapi sabalah molah datuak kami manyidiokan dahulu hanyo datuak
Ujuang
Lah sampai datuak
Pangka
Bilang singgo itu dahulu hanyo datuak
Ujuang
Jokok ka saba, saba molah datuak, akan tetapi iyo agak basugiro hanyo datuak
Pangka
Iyo saba juo molah datuak karano bulangan alun arek rantau jauh kadijalang komah datuak
Ujuang
Manuntut sekali lagi
Pangka
Nan kadipulangkan kapado datuak iyolah tantang kandak datuak tadi komah, jokok rupo iolah sapamandangan, buni lah sapandangaran pulo ko mah datuak
Ujuang
Lah sampai datuak
Pangka
Bilang singgo itu dahulu hanyo datuak
Ujuang
Nimba dangkato lah babari pitua dari pado datuak nan sapatah nantun lah sanang hati sagalo datuak kito lainnyo datuak
Pangka
Baliau datuak, datuak..............
Nan kadipulangkan kapado datuak nan pitua juo disagalo datuak kito nan banamo silang nan bapangka karajo nan bajunjuang kan iyo juo bak pitua komah datuak
Jokok korok simalakamo
Si sia palipun jauh
Malang nan indak dapek di tulak
Mujua nan indak dapek diraih
Dikaja mujua kok lari, diraieh malang kok tibo manjalang, korong kampuang datuak iyolah datuak katagak di muko kami tagak di balakang hanyo datuak.
Ujuang
Lah sampai datuak
Pangka
Bilang singgo itu dahulu hanyo datuak
Ujuang
Sabalah datuak samintaro nak ambo paiyokan kapado datuak kito dahulu hanyo datuak
Pangka
Saba molah datuak
Nan pitua dari sagalo datuak kito baiek dituan sagalo guru dangkato basuo nan saganok nantun padang basarikek juo kitonyo lai datuak....
Ujuang
Nan kadipulangkan kapado datuak nan pitua dek sagalo datuak kito nan banamo silang nan bapangka karajo nan bajunjuang kan iyo juo bak pitua ko mah datuak
Mandi kalubuak ampang pulai
Sinan kaladi mudo-mudo
Sungguah pun kami manjapuik marapulai
Wak kito nan sakaduduek kan nangko iyo pulo komah datuak
Pangka
Nan pitua di sagalo datuak kito nan banamo silang nan bapangka
Ramilah pakan nak rang silungkang
Rami dek anak rang pitalah
Nak lalu ka banu hampu
Dululah datuak turun dijanjang
Kok lai takdia Allah
Disinan sajo kito batamu
Ujuang
Lah sampai datuak
Pangka
Bilang singgo itu dahulu hanyo datuak
Ujuang
Nimba katolah babari pitua lah sanang paratian nyolai datuak
Mancabuik tungkek
Nimba kato rupo lah sapamandangan buni lah sapandangaran lah sarang tagak maurak selo hanyo datuak
Pangka
Kami nan tanamo silang nan bapangka lah mairingkan pulo komah datuak
0 Komentar untuk "Pidato Adat Maanta Marapulai"