Pidato Adat (Pidato Rarak)

Sunday, November 13, 2016

Ujuang

(manuntuik Panggilan)

Pangka

Mamulangkan naksu
bawakie

Kuak Padang 

Ujuang

Sarang baranang

Bakuak padang

Adapun nan sapanjang baliau wakiekan kapado diri ambo nan ka ambo puhum parsambahan kapado datuak alah diateh kadatangan kami jo ande-ande kito dari mudiak niin kamari nangko mah datuak

Nan baa jokok di ateh kadatangan kami dari mudiek niin kamari nangko, tak kalo kaki kami langkahkan, tangan di ayunkan, kato kadikatokan iyo banalah di lapeh niniek mamak, kampong jo jorong suku nan bapanghulu, rumah nan wali kampong, baa nan tuo, mambaok nasi nan satungkuh, lado nan sapatah, garam nan sacacah aie. nan salabu kalaluannyo bana jokok rupo di dangapun lah baiek buni, nan baa kini jokok di datuak kanlah datuak nanti jo lapiak nan takambang, tabia nan tarantang, langik-langik nan tagantong, sarato sirieh jo carano punlah di atok, kan pulo banta nan duolah di bantangkan lapiak siam nan bajaik jo banang ameh, nan basuji jo banang suto kaduduk kan iman jo khatik datuak sagalo panghulu rumah nan bawali kampong ba nan tuo.

Adapun nan dikatokan nan bak sapanjang adat alah iyo tunduak nan bakatelengan rocok nan batampun abu, sari nan batampuak tangan sarato manyarahkan, manumpahkan anak kamanakan kami kapado datuak suku nan ba panghulu rumah ba nan wali kampuang ba nan tuo

Nimba dan katolah tatuduah sagalo datuak suku nan panghulu, rumah ba nan wali, kampuang ba nan tuo, sabuah mukasuik nan balun sampai gadang singajo nan balau jalang, nan balau partimbangkan pa pulangkan di anda-anda kito

Dari suku dalam suku

Dari korong kadalam korong

Pun dari nagari ka nagari

Balaulah manjalankan nan bak sapanjang adat, baa dang katolah tatuduah nan sadok iko lah ta hadir pulo nan sadok itu, baa jokok alah jo tantang elok jo buruaknyo tumbuah silang jo salisieh, baik bantah jo kulahi di sukupun sakali, jokok titiek sajo muaro bak hujan, hinggok muaro bak langau, malang nan indak dapek di tulak mujua nan indak dapek diraih, di kaja mujua kok lari, diraih malang kok tibo baik dilabuah di galanggang di balai balerong panjang atau dipasa rami pun sakali iolah datuak katagak dimuko kami lah katagak dibalakangnyo aratinyo bana datuak

Jokok diumpamokan ibarat kabaulah takandang ka urang siko nimba jokok amehlah kapuro kapado datuak hanyolai datuak, sakian sambah titah lah bapuhum kapado datuak nyo lah datuak.........

Pangka

(disabakan)

panggil

Jokok nan sapanjang parsambahan datuak tadi iyolah ambo pulangkan kapado datuak kito nan tanamo silang bapangka karajo nan bajunjuang, nan pitua dari pado baliau kan iyo juo bak pitua datuak kan iyolah angkuah barek baban di kami, dan kato baban barek nan kadipikue kan iyo juo bak pitua datuak komah datuak

Jokok manjujuang biaso basingguluang

Mamik biaso bakulipeh

Nak ringan baban di junjuang

Nak layua tampuak di tangkai

Nimba di sinan.....

Sairiang balam jo barabah sairiang adat jo limbago, baa dangkato adat ka datuak pakai, jokok limbago iyo batuang pulo hanyo datuak, sakiro-kiro itu pulo nan ka baienyo di ambo nan sapanjang parsambahan datuak tadi hanyo datuak

Ujuang

Lah sampai datuak

Pangka

Bilang singgo itu dahulu hanyo datuak

Nimba adeklah kami pakai, jokok limbago lai batuang pulo, nimba kini ba mudiekkan janang hanyo datuak

Ujuang

(kirimkan)

Baa dan kato lah baiek tarupo, jokok batungkuih ba bukak, bakabek ba ungkai hanyo datuak

Pangka

(saba lalu dipanggie)

Tantang pakirim datuak tadi, bakirim pulo kami di janang lah sampai ka haribaan datuak nan pitua di sagalo datuak nan tanamo silang nan bapangka karajo nan bajunjuang, jokok batungkuh lah babukak, bakabek iolah baungkai pulo kalaluannyo bana, iyolah batamu rueh jo bukunyo lai datuak, baa jokok sanggan iko karek ateh mato nan samo kito panyalang talingo samo kito panyariang, aratinyo bana padang basarikek juo kito tantang itu hanyo datuak sakiro itu pulo nan ka baienyo nan sapanjang pitua datuak tadinyo lai datuak..........

Sawah gadang nan bapamatang

Gurun tandeh nan bapintalak

Anak istri nan balambai

Alah iyo lambai nan bak sapanjang adat

sarato lambai bak sapanjang syarak, iyo siang juo kami nak bak hari tarang juo nan bak bulannyo datuak....

Ujuang

(Sabakan lalu panggil)

Sawah gadang nan bapamatang

Gurun tandeh nan bapintalak

Anak istri nan balambai

Alah iyo lambai nan bak sapanjang adat

sarato lambai bak sapanjang syarak, iyo siang juo kami nak bak hari tarang juo nan bak bulan

Nan pitua di sagalo datuak kito nan tanamo silang nan bapangka karajo nan bajunjuang, jokok lambai nan bak sapanjang adat, jokok sakik batawa, damam baureh nyo lai datuak, sakiro-kiro itu pulo nan kabayie nan sapanjang pitua datuak tadinyo lai datuak....akan tetapi jokok nan lambai nan bak sapanjang sarak iyo juo hanyo kato ayat ini ARRI JALLU KAUWA MUNNA ALAM NISSAAK

aratinyo bana datuak suami itu adalah pemimpin pado isterinyo jokok ka pai batanyo, jokok ka pulang baburito kacuali kasungai jo tapian nyo datuak sakiro itu pulo nan ka beienyo nan sapanjang pitua datuak tadinyo datuak...........

Pangka

 Bakauw

Jokok nan niek di kami nan tanamo silang nan bapangka karajo nan bajunjuang alah tantang dirinyo kaduo nangko komah datuak, nimba dang kato alah di patamukan Allah ta'ala kapado antaro kaduo balah pihaknyo ado paruntuang molahnyo handaknyo datuak ado saiyo sapantang, panjatian, jokok umua dipanjangkan Allah, rasaki dimurahkan Allah, apo-apo mukasuik kan baieklakeh juo disampaikan Allah handaknyo datuak

Minta pulang