Ujung
Baliau datuak, ka saisi rumahnyolah tampek ambo mamulangkan pasambahan, nan baa kapado datuaklah pulangnyo parsambahan ambo datuak.
Pangka
Kapado tuhan malah datuak
Ujuang
Adapun nan ka ambo puhunkan kapado datuak, nan pitua disagalo datuak kito, baik di tuan sagalo guru, jkok duduak kami nak marawik ranjau, tagak nak maninjau jarak, nak tantu haluan ka dituruik, nan peto alamaik ka ditembak, sungguhpun baitu babari pitua dari pada datuak nan sapatah nantun hanyo datuak.
Pangka
Lah sampai datuak
Ujuang
Bilang singgo itu dulu datuak
Pangka
Sabalah molah datuak, samintaro nak ambo pulangkan kapado sagalo datuak kito nan tanamo silang bapangka dahulu hanyo datuak.
Ujuang
Sabalah molah datuak
Pangka
Baliau datuak, datuak........., Nan kadipulangkan kapado datuak, apolah nan pitua datuak tadi, jokok duduak nak marawik ranjau, tagak nak maninjau jarak, nak tantu haluan ka dituruik, nan peto alamaik ka ditembak, kan baitu kato datuak tadi.
Ujuang
Bana tumah datuak
Pangka
Nan pitua di sagalo datuak kito nan tanamo silang bapangka, apobilo kaciek utang dek angsuran, lansainyo yo dibayaran juo hanyo datuak.
Ujuang
Lah sampai datuak
Pangka
Bilang singgo itu dahulu hanyo datuak.
Ujuang
Baa dang kato lah babari pitua daripado nan sapatah nantun, babari kami janang hanyo datuak (kemudian menyirieh). Baliau datuak, datuak..............., Bakirim kami ka janang, lah sampai kolah kahadapan datuak.
pangka
Iyolah baik tarupo ko mah datuak.
Ujuang
Nan baa dang katolah baik tarupo, kok sirieh bamakan, timbakau barokok, kok pinang badidih hanyo datuak. (beberapa orang yang pantas di siriehi)
Pangka
Baliau datuak, datuak...................Nan kadipulangkan kapado datuak, alah iyo di ateh malelokan sirieh nan sacabiek, ataupun timpabakau nan sarokok, sorang baranang minum aie, sambie manyaruak galah lalu, lai kolah raso kamanjadi, sungguahpun baitu babari kami pitua hanyo datuak.
Ujuang
Lah sampai datuak.
Pangka
Bilang singgo itu dahulu datuak.
Ujuang
Sabalah datuak samintaro nak ambo paiyokan kapado sagalo datuak kito, baik dituan sagalo guru.
Pangka
Sabalah molah datuak
Ujuang
Baliau datuak, datuak...............Nan kadipulangkan kapado datuak apolah nan pitua datuak tadi, sorang baranang minum aie, sambie manyiruak galah lalu kan baitu kato datuak tadi.
Pangka
Banatumah datuak
Ujuang
Nan pitua di sagalo datuak kito baik di tuan sagalo guru, lah baiek manyanang nyolai datuak balakukan sajo hanyo datuak. (kemudian dilanjutkan manyirieh jikok masih ada nan belum).
Baliau datuak,..........Nan kadipulangkan kapado datuak alah ito di ateh malelokan sirieh nan sacabiek, atau timbakau nan sarokok, ado juo kolah ta impik di batangnyo, ataupun nan tasaok di daunnyo, sungguh pun baitu babari pitua dari pado datuak nan sapatah nantun hanyo datuak.
Pangka
Lah sampai datuak
Ujuang
Bilang singgo itu dulu datuak
Pangka
Saba molah datuak samintaro nak ambo pulangkan kapado sagalo datuak kito nan tanamo silang bapangka dahulu hanyo datuak.
Ujuang
Saba Molah datuak
Pangka
Baliau datuak, datuak...........Nan kadipulangkan kapado datuak apolah nan pitua datuak tadi, ado juo kolah nan taimpik di batangnyo, ataupun nan tasaok di daunnyo, kan baitu kato datuak tadi.
Ujuang
Bana tumah datuak
Pangka
Nan pitua disagalo datuak kito nan tanamo silang bapangka, jokok pandang jauh lah kami layangkan, pandangan hampieng lah di tukiekkan, kalaluannyo bana, jokok elok rupo lah sapamandangan, elok buni alah sapandangaran, baatohnyo kok ado juo nan tingga samo kito japuik juo hanyo datuak.
Ujuang
Lah sampai datuak
Pangka
Bilang singgo itu dahulu datuak
Ujuang
Nan baa dang katolah babari ambo pitua daripado datuak nan sapatah nantun lah sanang peratian kami hanyo datuak.
Baca juga:
0 Komentar untuk "Pidato Adat Baju Gadang (Maanta Marapulai)"