Pidato Pasambahan Adat Minangkabau

Monday, May 30, 2016

Gulamo mudiak ka hulu

Kanailah anak ikan tilan

Matilah anak bada balang

Pusako niniak nan dahulu

Lai babunuah bakanakan

Kini manjadi undang-undang

Elok ranahnyo minangkabau

Rupo karambie tinggi-tinggi

Cando pinangnyo lingguraian

Rupo rumpuiknyo ganti gantian

Bukik baririk kiri kanan

Gunuang marapi jo singgalang

Tandikat jo gunuang sago

Pasaman jo gunuang talang

Pudiang ameh batimba jalan

Baringin manangah koto

Labuah luruih jalannyo goloang

Sawah batumpak di nan data

Ladang babidang di nan lereang

Banda baliku turuik bukik

Cancang latieh niniak muyang

Tambilang basi rang tuo-tuo

Sawah lah sudah jo lantaknyo

Ladang lah sudah jo ranjinyo

Sawah balantak basupadan

Ladang di agiah bamintalak

Padang di bari baligundi

Rimbo di agiah bajiluang

Bikiek di bari bakaratau

Ka ateh nyato ta-ambun jantan

Kabawah nyato takasiek bulan

Niniek mamak punyo ulayat

Hak nyato bapunyo

Ganggam nyato bauntuak.

Rumah gadang basandi batu

Sandi banamo alua adat

Tonggak banamo kasandaran

Atok ijuak dindiang baukie

Gonjong ampek bakilatan

Banamo rabuang mambucuik

Timah mamutiah di atehnyo

Tonggak gaharu lantai cindano

Tarali gadiang balariek

Bubungan burak ka tabang

Tuturan labah mangirok

Paran gamba ula ngiang

Bagaluik rupo cino

Sala manyalo aie perak

Anjuang batingkek ba alaun-alun

Tampek manyuri manirawang

Paranginan puti di sanan

Limpapeh rumah nan gadang

Sumarak dalam nagari

Hiasan di dalam kampuang

Umbun puro pagangan kunci

Pusek jalo kumpulan ikan

Nan tasabuik bundo kanduang

Barieh balabeh minangkabau

Satitiek nan pantang hilang

Sabarih nan indak lupo

Jauah nan buliah ditunjuakkan

Dakek nan buliah di dakokkan

Nan salilik gunuang marapi

Nan saedaran gunuang pasaman

Dari singkarak nan badangkang

Sinan buayo putiah daguak

Sampai ka pintu rajo hilie

Durian di takuak rajo

Si pisau-pisau anyuik

Sialan balantak basi

Dakek aie babaliek budiak

Sailiran batang bangkaweh

Sampai ka ombak nan badabuah

Hinggo lawik nan sadidieh

Sahinggo sakilang aie bangih

Pasisie banda sapuluah

Hinggo taratak batu hitam

Sampai ka tanjuang simalidu

Di dalamnyo luak nan tigo

Luak agam jo limo puluah

Sarato luak tanah data

Di dalamnyo rantau jo pasisie

Disabuik panjang bakaratan

Gadang nan bakabungan

Laweh nan basibiran

Nan jauah mancari suku

Jikok dakek mancari indu

Jauah cinto man cinto

Jikok dakek jalang man jalang

Mamakai duo kalarasan

Lareh bodi caniago

Duo lareh koto piliang

Disabuik bajanjang

Naiek batanggo turun

Ibarat tangan suok jo tangan kida

Bacarai-carai tak bapisah

Bapisah-pisah tak baragiah

Ibarat kuku dengan dagiang

Samo mamegang kato pusako

Nan disabuik di dalam adat :

Kato pusako di bodi caniago

Putuih rundiang di sakato

Rancak rundiang dipakati

Latakkan suatu di tampeknyo

Dimakan alua jo patuik

Di dalam cupka jo gantang

Di kanduang adat jo limbago

Tuah tanyato dek sapakat

Cilako iyo dek basibang

Kato pusako dalam koto piliang

Nan babarih nan bapaek

Nan baukue nan bakalubuang

Curiang barih bulieh diliek

Cupak panuah gantang babubuang

Cupak tak buliah dilabihi

Gantang tak dapek dikurangi

Barih tak buliah di lampaui

Adat di alam minangkabau

Adat basandi syarak

Syarak basandi kitabullah

Syarak mangato adat mamakai

Gantang di bodi caniago

Cupak dijadikan ka sukatan

Adat mamakai syarak mangato

Ujuik satu balain jalan

Si muncak mati tarambau

Ka ladang mambao ladiang

Luko lah pao ka duonyo

Adat jo syarak di minangkabau

Mamegang naraco jo katian

Iyo lah panghulu-panghulu di nagari

Nan di sabuik niniak mamak pamangku adat

Sarato manti jo dubalang

Syarak nan lazim di minangkabau

Nan mamegang kitabullah dengan sunnah

Iyolah alim jo ulama

Suluah bendang adat limbago

Tahu di halal dengan haram

Tahu di sunat jo paradu

Sarato syah jo bata

Tampek batanyo di nagari

Syarak mangato di ulama

Panghulu nan hutang mamakaikan

Undang nan tetap dijalankan

Iyo dipegang pamarentah

Adat nan kewi syarak nan lazim

Undang nan balukih

Panghulu panghulu di minangkabau

Manuruik warih nan bajawek

Sarato pusako nan batolong

Kayu gadangdi tangah koto

Nan bapucuek sabana bulek

Nan baurek sabana tunggang

Batang gadang dahannyo kuek

Daun rimbun buahnyo labek

Batang gadang tampek basanda

Urek bakeh baselo

Dahan kuek tampek bagantuang

Buah labek buliah dimakan

Daun rimbun tampek balinduang

Tampek balinduang dari kapanasan

Bakeh bataduah kahujanan

Iyo dek anak kamanakan

Nan salingkuang cupak adat

Nan sapayuang sapatagak

Dibawah payuang di lingkuang cupak

Manjala masuak nagari

Ka pai tampek batanyo

Ka pulang bakeh babarito

Kusuik nan kamanyalasai

Karuah nan ka manjanihi

Hukum adie katonyo bana

Sayak landai aie nyo janieh

Elok nagari dek panghulu

Rancak kampuang dek nan tuo

Elok musajik dek tuangku

Rancak tapian dek nan mudo

Elok rumah tanggo jo bundo kanduang

Sapakat lahia jo batin

Sasuai muluik jo hati

Kamanakan barajo mamak

mamak barajo ka penghulu

penghulu barajo ka mufakat

mufakat barajo ka nan bana

bana badiri sandirinyo

nan manuruik alua jo patuik

pancaringek jo batang kapeh

tumbuah sarumpun jo batang dadok

duri nan tumbuah tiok tangkai

tampuo basarang pado baniah

ingek ingek nan di ateh

nan dibawah kok maimpok

tirih kok datang dari lantai

galodo kok datang dari hilia

ingek samantaro balun kanai

malantai sabalun lapuak

maminteh sabalun anyuik

kito bukan nan dari ateh

tidak mambasuik dari bumi

tapi datang karano di anjuang

tinggi karano di lambuik

baca juga pidato adat sebelum makan karena ini juga sangat penting dipelajari, karena juga menyangkut tentang bagaimana cara beradab dirumah orang, bagi warga minangkabau ini mesti tahu dan bisa dipraktekkan.