Tibo Dirumah Padusi
Pangka
Sungguahpun datuak dang katolah rapek sagalo datuak baik sagalo guru katampek ambo mamulangkan pasambahan ambo hanyo datuak, datuak.............Adapun nan ambo pasambahan kapado datuak nan pitua di sagalo datuak kito nan tanamo silang nan bapangka karajo nan bajunjuang kan iyo juo bak pitua komah datuak
Jokok manjuluak maadang buah
Malantiang maadang tampuak
Jikok dijuluak alalah rareh
Nan dijapuik alah lah tabao
Kan lah duduak samo jo kito dipandang lah elok rupo di dangapun lah baiek buni, baatohnyo kini nan kadibanarkan juo kapado datuak alah kapado pihak diri kami nan bak baduo urang nangko, kurang bulangannyo arek, arek lai koh biaso dipalungga, barek lai koh biaso diparingan sungguahpun baitu babari kami pitua hanyo datuak
Ujuang
(disabakan dulu lalu dipanggil)
Nan kadipulangkan kapado datuak apolah pitua dari pado datuak tadi
Jokok manjuluak maadang buah
Malantiang maadang tampuak
Jikok dijuluak alalah rareh
Nan dijapuik alah lah tabao
Kan lah duduak samo jo kito dipandang lah elok rupo di dangapun lah baiek buni, baatohnyo kini nan kadibanarkan juo kapado datuak alah kapado pihak diri kami nan bak baduo urang nangko, kurang bulangannyo arek, arek lai koh biaso dipalungga, barek lai koh biaso diparingan kan baitu bana kato datuak tadi datuak..........Nan pitua dari sagalo datuak baiek di tuan sagalo guru lah dalam biaso tumah datuak, jokok arek biaso di palungga, barek biaso diparingan sakiro-kiro itu pulo nan kabayie di ambo nan sapanjang pitua datuak tadi hanyo datuak.................
Pangka
Lah sampai datuak
Ujuang
Bilang singgo itu dahulu datuak
Pangka
Baa dang kato lah babari ambo pitua daripado datuak nan sapatah nantun lah sanang bana paratian ambo hanyo datuak, lah ambo lakukan sajo hanyo lai datuak.........
Ujuang
(sungguh singkek)
Nan ka ambo puhum parsambahan kapado datuak apolah nan pitua disagalo datuak baiek di sagalo guru kito, kan iyo juo nan bak pitua komah datuak
Ramilah pakan nak urang sintuak
Rami dek anak kurai taji
Tampek manjua kain suto
Ditanun anak maanda ilei
Suto nan datang dari jao
Di ampai lalu dilatakkan
Di lipek dalam peti
Di baok nak urang ka guguak
Nan ka dibanarkan juo kapado datuak
Pihak kapado diri kami
Alah gak talalai kami tibo jalan bakelok bakeh lalu
Jalan jauh baliku pulo
Alah panek sagalo datuak dek mananti
Jaan lah upek tibo di kami
Itulah sambah nan dibanakan kapdo datuak hanyo datuak..............
Sungguah pun baitu babari kami pitua hanyo datuak
Pangka
Lah sampai datuak
Ujuang
Bilang singgo itu dahulu hanyo datuak
Pangka
(disabakan dulu)
Nan sapanjang pitua datuak tadi iyolah ambo pulangkan kapado datuak kito nan tanamo silang bapangka karajo nan bajunjuang, nan pitua dari pado baliau, kan iyo juo bak pitua komah datuak.
Badanga badia di koto
Kanailah ruso balang kaki
Mamakan padi nak rang suntuak
Ruso nan datang dari alai
Mati tatembak dalam lubuak
Kalurah jalan karanah
Karanah ka koto ampek
Baliku jalan rang ka lakuak
Manolah datuak juru bahaso
Sapanjang panitahan datuak tadi
Tak ka tidak datuak talalai
Manuruik pikiran hati datuak
Manuruik jalan nan datuak tampuah
Jalan bakelok bakeh lalu
Basimpang baliku pulo
Sajaknyo datuak turun dari janjang
Urang jaori nan malapeh
Dimalah upek nan katibo
Alah dalam barih datuak mamaek
Alah kasanang hati datuak.............
Ujuang
Lah sampai datuak..................
Pangka
Bilang singgo itu dahulu hanyo datuak
Ujung
Lah sampai datuak
Pangka
Bilang singgo itu dahulu hanyo datuak
Ujuang
Nan baa dang kato lah babari ambo pitua dari pado datuak nan sapatah nantun lah sanang bana paratian ambo hanyo datuak, ......babari kami janang hanyo datuak
- menyirih
- mamatikan sirih
- sarang baranang
- maanta tungkek
- minta izin
- sungguh panjang
- kuak pahadang
- bawakie
Ujuang
Sungguhpun datuak dang kato lah rapek sagalo datuak nan banamo silang nan bapangka karajo nan bajunjuang katampek ambo mamulangkan pasambahan, nimbaa kapado datuak juolah pulangnyo pasambahan ambo.
Pangka
Kapado kito basamo molah datuak mamulangkannyo
Ujuang
Nan kadipulangkan kapado datuak, nan pitua juo komah datuak di sagalo datuak baik disagalo guru kito
Nak duo cancang saguragai
2 , 3 kalatiek naiek
Lai kolah raso kamanjadi
Sungguah pun baitu babari kami pitua hanyo datuak
Pangka
(saba dan ulangi pitua tadi)
Nan pitua di sagalo datuak kito nan banamo silang nan bapangka karajo nan bajunjuang lah ka manjadi nyo lai datuak
Ujuang
Nan baa kato lah babari kami pitua dari pado datuak nan sapatah nantun lah sanang hati kami datuak
Lah ambo lalukan sajo nyo lai datuak.......
bawakie (sungguh panjang minta isin)
Mamulangkan Naksu
Pangka
Nan kadipulangkan kapado datuak nan pitua disagalo datuak kito nan banamo silang nan bapangka karajo nan bajunjuang kan lah sadio pulo naksu kami nan kadihadirkan kapado sagalo datuak kito baiek di tuan sagalo guru, sungguahpun baitu babari kami pitua hanyo datuak
Ujuang
(sabakan dan ulangi lah sadiokan na'su)
Nan pitua dek sagalo datuak kito baik di tuan sagalo guru kan bak pitua datuak juo
Bakatangahkan nyo datuak, nak elok rupo dipandang, nak baiek buni di danga, sakiro-kiro itu pulo nan ka bayie nan sapanjang pitua datuak tadi hanyo datuak................
Pangka
(Berwakie)
Adapun nan sapanjang baliau wakiekan nan ka ambo puhum pasambahan kapado datuak, jikok dihari sahari tadi, jokok dimalam samalam kini, angkuah babaue adat jo sarak, nan baa jokok nan sapanjang sarak kan lah dilangsuangkan dek guru kito di surau atau musajik, manuruik petatah jo petitihnyo, manuruik adek jo limbagonyo nan sapanjang pitaruah nabi kito Muhammad SAW, nan jikok nan sapanjang adek iyo nak babari juo ambo pitua dari pado datuak nan sapatah nantun hanyo datuak........
Ujuang
(disabakan lalu dipanggie)
Nan kadipulangkan kapado datuak iyolah nan pitua daripado datuak tadi, jokok dihari sahari tadi, jokok dimalam samalam kini, angkuah babaue adat jo sarak, nan baa jokok nan sapanjang sarak kan lah dilangsuangkan dek guru kito di surau atau musajik, manuruik petatah jo petitihnyo, manuruik adek jo limbagonyo nan baa sapanjang adek kan nak babari pitua dari pado datuak nan sapatah nantun, kan baitu kato datuak tadi
Pangka
Bana tumah datuak
Ujuang
Nan pitua disagalo datuak kito nan tanamo silang bapangka karajo nan bajunjuang
Jikok karambie kan lah tinggi-tinggi
Pinang lah lingguyuran
Sumua lah lamo di basauak
Jalan lah lamo datuak tampuah hanyo lai datuak.......
Sakiro-kiro itu pulo ka bayie nan sapanjang pitua datuak tadi hanyo datuak............
Pangka
Baa dang katolah babari ambo pitua dari pado datuak nan sapatah nantun lah sanang paratian ambo hanyo datuak, baatohnyo kini nan kadibanakan juo kapado datuak , dan kato kami lah ka malelokan nan bak sapanjang adek sagalo datuak kito
Malang nan indak dapek ditulak
Mujua nan indak dapek diraih
Jikok basuo tunggue nan ka manaruang
Rantiang nan mangalatiak
Bak manolah unutuang kami ko datuak, sungguah pun baitu babari ambo pitua dari pado datuak nan sapatah nantun hanyo datuak............
Ujuang
(Disabakan kemudian dipanggie)
Nan pitua di sagalo datuak kito nan tanamo silang nan bapangka karajo nan bajunjuang, jikok basuo nan sapanjang pitua datuak tadi mamulangkan molah datuak kapado kami nan tanamo silang nan bapangka, supayo baa mangkok betu, kusuik nak buliah kami salasaikan, karuah nan bulieh kami janiehkan kasayak nan landai ka tapian nan suci, sakianlah nan kaba aienyo nan sapanjang pitua datuak tadi hanyo datuak.......
Pangka
Nan baa dan kato lah babari ambo pitua dari pado datuak nan sapatah nantun lah sanang bana paratian kami hanyo datuak, akan tetapi nan kadipulangkan juo kapado datuak ........bajalan nan indak sadang salangkah, bakato nan indak sadang sapatah, jokok talalai kami di jalan atau takudian kami dari pado datuak babari kami maaf hanyo datuak........
(disabakan dan dipanggil)
Nan pitua di sagalo datuak kito nan tanamo silang nan bapangka karajo nan bajunjuang, jokok takudian kami daripado datuak, samo babari maaf hanyo datuak, baatohnyo jokok barasaki pulo kami sapaningga datuak babari pulo kami pitua hanyo datuak.
Ujuang
Lah sampai datuak
Pangka
Bilang singgo itu dahulu hanyo datuak
Ujuang
Nan pitua di sagalo datuak kito baik sagalo guru kito jokok barasaki datuak sapaningga kami batarimo jo hati nan suci jo mungko nan janieh nyo datuak...............
Pangka
Lah sampai datuak
Ujuang
Bilang singgo itu dahulunyo tuak
Pangka
Nan baa dan kato lah babari dari pado datuak nan sapatah nantun lah sanang paratian ambo nyo lai datuak
Ujuang
Lah katagak kami hanyolai datuak (baitu molah datuak)
Nan baa dan kato kamilah katagak datuak lah katingga disinan kan iyo juo nan bak pitua komah datuak
Aluih didih pandan lawik
Dididih anak rang taratak
Babelok jalan ka sikinjang
Elok layienyo biduak lawik
Nan kodoh baru padoman tidak, nan mano pulo kolah pulau nan kadihadang, sungguahpun baitu babari pulo pitua hanyo datuak
Pangka
Nan kato datuak lai barampieng jo datuak..............kabaliau molah datuak batanyo molah datuak............
Ujuang
Nimba jauh lah batunjuakkan hampieng lah bakakokkan lah sanang bana hati ambo hanyo datuak, ambo lah tagaknyo lai datuak
Pangka
Mancabuik tungkek
Ujuang
Balau datuak
Kami lah tagaknyo lai datuak
Pangka
Baitu molah datuak (Lalu basidaun masuak dalam biliek)
0 Komentar untuk "Pidato Adat Tibo Dirumah Padusi"